Ortalyq komýnıkasıalar qyzmetinde mindetti áleýmettik saqtandyrý júıesiniń elimizde qyzmet atqarýynyń ózekti aspektilerine arnalǵan baspasóz konferensıasy ótti, dep jazady Qamshy.kz aqparat agenttigi.
İs-sharaǵa «Memlekettik áleýmettik saqtandyrý qory» AQ-nyń prezıdenti Sáýle Dúısenova jáne basqarýshy dırektory Nursulý Kemel qatysty.
2017 jyly 772 myńnan astam qazaqstandyqtar Memlekettik áleýmettik saqtandyrý qorynan 156,5 mlrd. teńge mólsherinde áleýmettik tólemder aldy.
Júktilik pen bosanýǵa, jańa týǵan balany asyrap alýǵa jumsalǵan qarjy 62,2 mlrd. teńgege jetse, balanyń bir jasqa tolýyna baılanysty kútimine 74,1 mlrd., eńbekke jaramsyzdyqqa qatysty 9,9 mlrd., asyraýshysynan aıyrylý boıynsha 7,8 mlrd. jáne jumyssyz qalýǵa qatysty 2,1 mlrd teńge qarastyrylǵan.
2018 jyly 1 qańtardaǵy jaǵdaı boıynsha Qazaqstanda 5,9 mln. adam úshin áleýmettik
aýdarymdar jasaldy.
Áleýmettik aýdarymdar jumysshynyń eńbekaqysynan ustalynbaıdy, olar jumys berýshiniń qarjysy esebinen tólenedi. Demek jumysshy óz menshik qarajatyn jumsamaıdy. Áleýmettik aýdarymdardyń mólsherlemesi tabystyń 3,5 %-yn quraıdy.
Áleýmettik tólemderdiń satyp alý qabilettilikterin qoldaý maqsatynda makroekonomıkalyq parametrlerdiń ózgeristerin, onyń ishinde qunsyzdanýlardy eskere otyryp, MÁSQ aktıvteriniń esebinen ár jyl saıyn eńbek etý qabiletinen jáne asyraýshysynan aıyrylýy boıynsha tólemderdiń mólsheri ósip otyratynyn atap ótý qajet. 1 qańtardan bastap osy sanattaǵy 100 myńǵa jýyq tólem alýshylarǵa áleýmettik tólemder mólsheri 16%-ǵa arttyryldy.
Mindetti áleýmettik saqtandyrý – bul eńbek etý qabiletinen, otbasy asyraýshysynan, jumysynan aıyrylǵanda, júktiligine jáne bosanýyna baılanysty nemese jańa týǵan balany asyrap alǵanda, sonymen qatar bala 1 jasqa tolǵanǵa deıingi kútimine baılanysty tabysynan aıyrylǵan jaǵdaı týyndaǵanda, jumys isteıtin halyqty qoldaý úshin qosymsha qorǵaý deńgeıi. Osy atalǵan jaǵdaılarda júıege qatysýshy (demek, ol úshin áleýmettik aýdarymdar júrgizgen jaǵdaıda) nemese onyń otbasy memleket tóleıtin áleýmettik járdemaqylarǵa qosymsha MÁSQ áleýmettik tólemder alady.
Qazaqstanda mindetti áleýmettik saqtandyrý júıesi engizilgen sátten bastap 4 mln. jýyq adam MÁSQ-nan jalpy somasy 905 mlrd. teńgeden astam áleýmettik tólemder aldy.
